Rev 4 | ASO | STEP | Ne'mine gamazi nene lo-nemo osu' lavo neloti' ninguvoni' nene Okulumoku' akahe nene gode neivo ninguve. Ne'mino ninge nouvo a'minguti' gomu' giluvoni' nolo ado' pikuli nolo gele vine' nolo ma'mo nene ti' lo lo-nimive: Gaza nene melo' dizo ano. Ne'mine oganivo naza idise neloti' alinge' soto' oka' oka' iline' initekumu' nene gelebizelove.

Revelation of John 4

Zohane' Okulumoku' O'moso Gubi' Izi Imi Opo'ni Li Nizavo Ningingumu' Gizine' Gamazi Ve

1 Ne'mine gamazi nene lo-nemo osu' lavo neloti' ninguvoni' nene Okulumoku' akahe nene gode neivo ninguve. Ne'mino ninge nouvo a'minguti' gomu' giluvoni' nolo ado' pikuli nolo gele vine' nolo ma'mo nene ti' lo lo-nimive: Gaza nene melo' dizo ano. Ne'mine oganivo naza idise neloti' alinge' soto' oka' oka' iline' initekumu' nene gelebizelove. 2 Mo ne'mine noline' velesi O'moso'mi Sikalahu' ne'mo zatuho o-nidivo mino Okulumoku' ninguvoni' nene guve'inesi vetevo' minaa' ani' mo'mosi' nene neivo ido' a'mingu' nene evene' ma mito' neivo ninguve. 3 A'mine mo'mosito' minive'mi emeni dameni've nene meni've dizo minine' geheni zasipalotikisi ido' koneliani geheni gulehetotikisi silingenge'ni hulaa' neine' ne'minosa minine' ve. Ido' a'mine mo'mosito' vodo vodo ogo gini' huzebe hize minine' nene ve'ne ve'ne elaa' ine' geheni emeladi ne'minosa nene zavile elo minine' ve. 4 Ido' a'mine Guvelesi ve'mi mo'mosi'velo' vodo vodo ogo mo'mosi' gohi tuvedi fo'a (24) minavo a'mine mo'mosito' nene gizebo ve tuvedi fo'a (24) genegana mokonokovo' ngili mini godo'nido' inite' ma kuvanadi ne'mine ngolidunu' lili' ani' gihikani' nene mito' minani' ve. 5 Ido' Guvelesi ve'mi mo'mosi'veloti' nene go' pa'na pa'na neivo nolo nolo molo go' lete lete lo minine' ve. Ido' a'mine Guvelesi ve'mi mo'mosi' ne'mi velela nene olo' livi' seveni ado' O'moso'mi Sikalahu've sevenilo' medeli minani' nene livi' livi' igi minani' ve. 6 Ido' a'mida inite' ma minine' nene ado' guvo noso ngalasidunu' lili' ani' gele vine' mo kilia gehepeve o minine' inite' ne'mine nene minine' ve.

Ido' olusoku' Guvelesi ve'mi mo'mosi'velo' vodo vodo ogo nene ele'vole' igi ve'inesi ha minaa' nani' inite' seta've seta've nene ma minani' ve. Ido' oko'ine'mi velelasi mehenelasi nene ve'ine gulo'movo' nene bize minine' ve. 7 A'mine ve'inesi ha minaa' ani' initekuti' ma neve nene laioni gulo gele vine' minine' ve. Ido' ezeloti' minive nene bulumaka' ne'mine gele vine' minine' ve. Ido' ezeloti' minine' inite' nene evene' gote vete gele vine' ne'minesi minine' ve. Ido' a'midoti' neve nene nolise naba patelo nomonine' emeni damenisi minine' ve. 8 Ido' a'mine ele'vole' igi ve'inesi ha minaa' nani' inite' seta've seta've ingine muki' hamo hamo' nene holoke'ne'ine sigisi sigisisi minani' ve. Ido' oko'ine mukito' ado' holoke'ne'ine luloukosi hetasi nene ve'ine gulo'movo' bize minine' ve. Ido' gamene gamene go' liha liti'muso iziha mo matesi ami ti' li li minaa' nave:

Guvekasi ve O'moso amuzoka vai' golososi minanive,
gomu' mino idise mino mine do dize'mo alinive gei' nene
mo kekeize atoli'mine gehepeve losa nane.
9 Ido' a'mine ele'vole' igi ve'inesi ha minaa' nani' initelite ne'mine li a'mine mo'mosi'velo' mino minevo' minevo' minaa' neive di hozi li-di opo'ni li isaa' neve li-dani' gamenelo' gamenelo' nene 10 a'mine gizebo ve tuvedi fo'a (24) ingine nete nene mo'mosi'velo' minive'mi velela nene limi ingi mini a'mine minevo' minevo' minaa' ive nene opo'ni lisa ingine di minani' amuzo'mi maki've minine' inite' kuvanadi angili'ine nene apasi mo'mosi' minine' velela milisa ti' li laa' nave:

11 Guvetesi ve mino O'mosote minanive gei' nene
inite' mata' muki' do soto' aine' nenako
ee, soto' igi minani' nene gei' lukalokovo' soto' igi minani' nenako
ne'mo gei' nene a'mine amuzokamu' gopo'ni lo do hozi lo-gedelonido' nene
mo lisihe' o nane.